Hef hafið nýtt og betra blogg.
http://aldisa.blogg.is/

Kíkið á það.
Aldís

Litla systir skákaði mér alveg um síðustu helgi er hún skírði frumburð sinn í höfuðið á mér.  Ég er rétt farin að geta sagt frá því óklökk og alveg ótrúlega stollt. 

Vona innilega að nafnið eigi eftir að reynast litlu frænku minni jafnvel og mér.

Aldís stóra!!

Þann 2 september síðastliðinn eignuðumst við litla frænku.  Hún er pínu ponsu lítil en samt sætust í heimi.  Magnað hvað hvert einasta nýfædda barn sem maður sér er einhvernveginn það fallegasta sem maður getur hugsað sér í heiminum.  Alla vega dafnar hún litla spons vel og á morgun verður hún skírð. 
Hvað á barnið að heita?

Við fjölskyldan höfum tekið upp nýja venju sem felst í því að farið er af stað í göngutúr um 10 leytið á sunnudagsmorgnum.  Fyrst fórum við í fjörurnar við Elínarhöfða og svo í gær var farið út að gamla vita.  Eftir göngutúrinn er svo komið inn í heitt kakó og heimabakaðar lummur með sultu og spilað.  Þetta hefur reynst hin besta leið til að endurhlaða batteríin fyrir komandi viku. 
Áhugasamir eru velkomnir með......
en það er skyldumæting í göngutúrinn til að fá lummurnar góðu. 

Haustið er komið á Skólabrautinni eins og annarsstaðar.  Það einkennist af harðsperrum á líkama og sál.  Er enn að bagsa við að koma stundaskránni saman.  Hún virðist saman standa af fimleika- og sundæfingum, körfubolta- og bootcampæfingum, þjálfun og aerobikkennslu.  Er enn að reyna að koma skrifum og lærdómi inn í jöfnuna en gegnur lítið.  Þetta er alltaf pínulítið átak og tekur 2-3 vikur en svo gengur þetta líka eins og smurt.  Er það ekki????

Við erum komin til baka eftir yndislega daga á Grænanesi í Steingrímsfirði á Ströndum.  Þar dvöldum við í góðum félagsskap því Ólöf og Elvar komu með okkur.  VIð fórum í sund á Drangsnesi, keyrðum strandirnar alla leið að Krossnesi gengum í fjörunni og grilluðum góðan mat.  Mér finnst alltaf jafn magnað að koma á strandirnar.  Þar er einhver undarlegur kraftur og erfitt að gera sér í hugarlund lífið sem fólk lifði þarna langt fram á síðustu öld.  VIð heimsóttum Helgu og Árna á Hólmavík sem eru amma og afi Brynjars.  Magnað fólk sem hefur lifað tímana tvenna og ótrúlega gaman að heyra þau segja frá lífinu eins og það var á Ströndunum í eina tíð.  Við stefnum á að fara aðra ferð norður í haust að tína ber. 

Góða helgi

Það hefur ýmislegt á daga okkar drifið hér á Skólabrautinni.  Við fórum í skemmtilegar bústaðarferðir bæði undir Eyjafjöllin og upp í Húsafell, hvorutveggja í mjög góðum félagsskap.  Svo voru Írskir dagar teknir með trompi, þá sjaldan maður er á landinu.   
Nú er stefnan sett á Svíþjóð í byrjun ágúst þar sem við ætlum að dvelja hjá Reyni og Mariu.  Þangað til er bara flatmagað í sólinni á skerinu og fundið sér eitthvað skemmtilegt að gera. 
 

Þjóðhátíðarsveifa á Merkurtúninu

Það var merkur áfangi hjá fjölskyldunni á sunnudaginn
 þegar Háihnúkur var sigraður. 

Okkur eru nú allir vegir færir.

 

Þá er bara korter í sumarfrí hjá restinni af fjölskyldunni.  Skólaslitin eru á mánudaginn hjá Sóleyju og Salka flytur þá á elstu deildina í leikskólanum.  Brynjar á hinsvegar eina viku eftir í sumarfrí.  Svo þetta er allt að gerast.  Veðrið leikur við okkur og það jafnast ekkert á við Langasandinn, Skógræktina og Merkurtúnið í blíðu síðustu daga.  Við mæðgurnar tókum hjólatúr á Langasand í vikunni með nesti og tilheyrandi.  Þar var buslað og leikið sér á stuttbuxum í blíðunni, borðað nesti og buslað meira og hjólað svo í sund.  Já lífið er bara notalegt á svona dögum.  Við ætlum að fara í göngu um helgina, byrja að feta okkur upp Akrafjallið.  Ég man nefnilega þegar við vorum úti á Tyrklandi, liggjandi í flæðamálinu í 40°hita.  Þá var maður svo viss um að ef maður væri heima á Íslandi þá væri maður alltaf að ganga á fjöll, fara í fjöruferðir og hjólatúra og ég man að ég lofaði sjálfri mér því að þegar ég yrði sumarlangt á Íslandi næst þá ætlaði ég að láta verða af þessu.  Svo nú liggur fyrir að sumarið fari akkúrat í þetta, göngur, hjólatúra, fjöruferðir og útilegur. 

Annars hafa síðustu dagar farið í Húllumhæ út um allan bæ.  Allstaðar verið að fagna sumrinu og loka vetrardagskránni.  Hef sjaldan verið jafn tilbúin til að jarða vetrardagskrána.  Klára hana áður en hún klárar mig.  Af því tilefni verður heljarinar húllumhæ hér á bæ.  Stefnan er að grilla góðan mat og taka svo hjólatúr í kvöldsólinni.  Það er eitthvað svo íslenskt.  Kannski maður beri svo á pallinn um miðnætti

Það er komið sumar.........
Vetur burtu farinn, tilveran fín.....
Góða helgi

Það er löngu komið vor og víst vel kominn tími á vorverkin.  Brynjar er með hausinn í kofasmíð og þið sem þekkið hann vitið að hann tekur hlutina með áhlaupi.  Hann fílar í botn að vinna frameftir kvöldi úti með hamarinn í smíðavestinu sínu, svo nú er að rísa í garðinum okkar þessi líka myndarlegi kofi. 
Vorverkin eru hafin hjá mér og felast að mestu leyti í því að slappa af og safna kröftum.  En það er á dagskrá að fara í gegnum alla fataskápa  og skúbba út gömlum lufsum.  Ég er búin að fara í gegnum minn og það er ekki mikið eftir.  Nú þarf bara að fara og fylla á.  En það er einmitt eitt af tveimur atriðum sem gera á í sumar.  Fylla á fataskápinn, finna mitt innra gellugen einhversstaðar og fara nú að vera svolítið smart.  Hitt er svo sem nátengt en það er að efna falleg fyrirheit um að koma sér nú í eitthvert form.....svo maður slittist ekki bara hérna um endalaust.  Ég ætla að byrja hlaupin í dag.  Nú svo er hægt að hugsa um fatakaup í framhaldi.  Hef á tilfinningunni að ég eigi eftir að humma það fram af mér eitthvað frameftir sumri.
 
En nú skokka ég af stað. 
Kannski ég haldi hér bókhald um hvernig gegnur, hversu oft og hversu langt er hlaupið.

Stefnan er sett á...... hmm ætla að hugsa það aðeins betur áður en ég geri það opinbert.
Góða helgi

Þá eru prófin búin og blaðran sprungin.
Úr mér allur vindur en hef þó allt sumarið til að safna kröftum.
Nú er bara spurning hvort ég eigi að fara í sund, göngutúr eða hjólatúr nú eða bara dorma aðeins lengur hér í sófanum. 
Stelpurnar eru úti á túni í fótbolta.  Þær systur eru saman í liði á móti einhverjum strákum með tilþrifum og gefa þeim ekkert eftir.  Salka er í marki og mér sýnist hún mest vera að fara í handahlaup.  Þær eru kátar og lífið á Merkurtúninu aldrei jafn heillandi og á vorin.




Sóley og 1 CBR

Góða helgi.

Jæja þá er fyrsta prófið búið.
Búið að rekja úr mér garninrnar í sjálfbærri þróun.  Eitt get ég sagt ykkur, mannkynið er á leið til glötunnar.  Allir eru sammála um að neysluvenjur okkar verða að taka stakkaskiptum ætlum við ekki að sigla í strand í náinni framtíð.  Hvað getum við gert.  Ja ganga eða hjóla mili staða, flokka rusl og vera vakandi um orkunotkun okkar, sem er eitthvað sem íslendingar eiga bara ekki til í sínum beinum.  Við verðum að gangast við samfélagslegri ábyrgð okkar og velta þessu fyrir okkur.  Staðreyndirnar eru skuggalegar og skiljanlegt að við viljum bara grafa hausinn í sandinn.  En eitt og annað getum við gert.  Til dæmis þá fer það betur með umhverfið að þvo þvott á lægsta mögulega hitastigi.  Ef við getum þvegið á 30° þá er það mun betra fyrir umhverfið en 40°.  Reynum að forðast að sjóða þvottinn  60° dugir til að drepa bakteríur og sýkla í handklæðum og þess háttar.   Margt smátt gerir eitt stórt.  bla bla bla bla bla.........

En nú er að draga fram umhverfisskipulags fróðleikinn.  Stór mannvirki í landslagi það er næst á dagskrá.  Námur, þjóðgarðar, svæði til sérstakra nota, varnargarðar, kirkjugarðar, formminjar........... spennó. 

Þið hin njótið sumarsins sem er víst komið.

Aldís

Hér stendur yfir hin árlega afmælistörn.
Heimilisfólk, vinir og vandamenn keppast við að eiga og halda upp á afmælin sín.
Próflestur er því skiljanlega í lágmarki.

Vorið komið og sumarið handan við hornið.  Það er verið að galla börnin upp fyrir íslenska sumarið.  Flíspeysur, regngallar, túttur og strigaskór.  Þetta er annarskonar staðalbúnaður en við höfum vanalega verið að koma okkur upp um þetta leyti.

Annars eru hér allir úti á túni.  Salka er að læra að hjóla og gengur svona glimmrandi vel.  Sóley fékk nýtt hjól og er hin hressasta með það.  Salka er komin á gamla hennar og er sömuleiðis mjög sátt. 

Lífið rúllar og rúllar
og prófin nálgast og nálgast.........

Jæks

Bill Gates fræðir unglinga um það sem þeim mun ekki verða kennt í skólanum en lífsnauðsin er engu að síður að kunna.

Regla 1: Lífið er ekki réttlátt, reyndu að venjast því.

Regla 2: Veröldinni er sama um þitt sjálfsálit. Allir ætlast til að
þú áorkir einhverju áður en þú ferð að vera ánægð/ur með sjálfa/n þig.

Regla 3: Þú munt ekki þéna 4 milljónir á ári strax þegar þú
útskrifast úr skóla og þú verður ekki framkvæmdastjóri fyrr en þú
hefur unnið
fyrir því.

Regla 4: Ef þér finnst kennarinn þinn strangur og erfiður, bíddu
þangað til að þú færð yfirmann.

Regla 5: Að snúa hamborgurum á skyndibitastað er ekki fyrir neðan
þína virðingu.
Amma þín og afi áttu til annað orð yfir það að snúa hamborgurum. Þau
kölluðu það TÆKIFÆRI.

Regla 6: Ef þú klúðrar, þá er það ekki foreldrum þínum að kenna svo
hættu að væla og lærðu af mistökunum.

Regla 7: Áður en þú fæddist þá voru foreldrar þínir ekki svona
leiðinleg eins og þau eru núna. Þau urðu svona eftir að hafa borgað
fyrir uppeldi þitt, þvo fötin þín, þrífa til draslið eftir þig og
hlusta á hvað þú ert COOL og þau eru hallærisleg. Svo áður en þú og
vinir þínir bjarga regnskógunum og leysið heimsmálin, reyndu þá að
taka til og koma reglu á herbergið þitt.

Regla 8: Það getur vel verið að skólinn útskrifi bæði sigurvegara og
tapara en lífið gerir það EKKI. Í sumum skólum er hægt að taka sama
prófið aftur og aftur. Þannig er þetta ekki úti í atvinnulífinu.

Regla 9: Lífið skiptist ekki í annir og þú munt ekki hafa frí öll
sumur. Mjög fáir samstarfsmenn munu hafa áhuga á að hjálpa þér að
finna sjálfan þig. Gerðu það í þínum eigin tíma !

Regla 10: Sjónvarpið er ekki raunveruleikinn. Í raunveruleikanum þarf
fólk í alvörunni að yfirgefa kaffihúsið og fara í vinnuna.

Regla 11: Vertu NICE við nördana í skólanum, það endar mjög líklega
með því að þú þarft að vinna hjá einhverjum þeirra.
THAT'S LIFE

Það er nú bara nokkuð til í þessu hjá karlinum.